योगराजोपनिषत्

This text does not support clickable word meanings.

योगराजं प्रवक्ष्यामि योगिनां योगसिद्धये ।

मन्त्रयोगो लयश्चैव राजयोगो हठस्तथा ॥ १ ॥

Edit Permalink Bookmark

योगश्चतुर्विधः प्रोक्तो योगिभिस्तत्त्वदर्शिभिः ।

आसनं प्राणसंरोधो ध्यानं चैव समाधिकः ॥ २ ॥

Edit Permalink Bookmark

एतच्चतुष्टयं विद्धि सर्वयोगेषु सम्मतम् ।

ब्रह्मविष्णुशिवादीनां मन्त्रं जाप्यं विशारदैः ॥ ३ ॥

Edit Permalink Bookmark

साध्यते मन्त्रयोगस्तु वत्सराजादिभिर्यथा ।

कृष्णद्वैपायनाद्यैस्तु साधितो लयसंज्ञितः ॥ ४ ॥

Edit Permalink Bookmark

नवस्वेव हि चक्रेषु लयं कृत्वा महात्मभिः ।

प्रथमं ब्रह्मचक्रं स्यात् त्रिरावृत्तं भगाकृति ॥ ५ ॥

Edit Permalink Bookmark

अपाने मूलकन्दाख्यं कामरूपं च तज्जगुः ।

तदेव वह्निकुण्डं स्यात् तत्त्वकुण्डलिनी तथा ॥ ६ ॥

Edit Permalink Bookmark

तां जीवरूपिणीं ध्यायेज्ज्योतिष्ठं मुक्तिहेतवे ।

स्वाधिष्ठानं द्वितीयं स्याच्चक्रं तन्मध्यगं विदुः ॥ ७ ॥

Edit Permalink Bookmark

पश्चिमाभिमुखं लिङ्गं प्रवालाङ्कुरसन्निभम् ।

तत्रोद्रीयाणिपीठेषु तं ध्यात्वाकर्षयेज्जगत् ॥ ८ ॥

Edit Permalink Bookmark

तृतीयं नाभिचक्रं स्यात्तन्मध्ये तु जगत् स्थितम् ।पञ्चावर्तामध्यशक्तिं चिन्तयेद्विद्युदाकृति ॥ ९ ॥

Edit Permalink Bookmark

तां ध्यात्वा सर्वसिद्धीनां भाजनं जायते बुधः ।

चतुर्थं हृदये चक्रं विज्ञेयं तदधोमुखम् ॥ १० ॥

Edit Permalink Bookmark

ज्योतीरूपं च तन्मध्ये हंसं ध्यायेत् प्रयत्नतः ।

तं ध्यायतो जगत् सर्वं वश्यं स्यान्नात्र संशयः ॥ ११ ॥

Edit Permalink Bookmark

पञ्चमं कण्ठचक्रं स्यात् तत्र वामे इडा भवेत् ।

दक्षिणे पिङ्गला ज्ञेया सुषुम्ना मध्यतः स्थिता ॥ १२ ॥

Edit Permalink Bookmark

तत्र ध्यात्वा शुचि ज्योतिः सिद्धीनां भाजनं भवेत् ।

षष्ठं च तालुकाचक्रं घण्टिकास्थानमुच्यते ॥ १३ ॥

Edit Permalink Bookmark

दशमद्वारमार्गं तद्राजदन्तं च तज्जगुः ।

तत्र शून्ये लयं कृत्वा मुक्तो भवति निश्चितम् ॥ १४ ॥

Edit Permalink Bookmark

भ्रूचक्रं सप्तमं विद्याद्बिन्दुस्थानं च तद्विदुः ।

भ्रुवोर्मध्ये वर्तुलं च ध्यात्वा ज्योतिः प्रमुच्यते ॥ १५ ॥

Edit Permalink Bookmark

अष्टमं ब्रह्मरन्धं स्यात् परं निर्वाणसूचकम् ।

तं ध्यात्वा सूतिकाग्रामं धूमाकारं विमुच्यते ॥ १६ ॥

Edit Permalink Bookmark

तच्च जालन्धरं ज्ञेयं मोक्षदं नीलचेतसम् ।

नवमं व्योमचक्रं स्यादश्रैः षोडशभिर्युतम् ॥ १७ ॥

Edit Permalink Bookmark

संविद्ब्रूयाच्च तन्मध्ये शक्तिरुद्धा स्थिता परा ।

तत्र पूर्णा गिरौ पीठे शक्तिं ध्यात्वा विमुच्यते ॥ १८ ॥

Edit Permalink Bookmark

एतेषां नवचक्राणामेकैकं ध्यायतो मुनेः ।

सिद्धयो मुक्तिसहिताः करस्थाः स्युर्दिने दिने ॥ १९ ॥

Edit Permalink Bookmark

एको दण्डद्वयं मध्ये पश्यति ज्ञानचक्षुषा ।

कदम्बगोलकाकारं ब्रह्मलोकं व्रजन्ति ते ॥ २० ॥

Edit Permalink Bookmark

ऊर्ध्वशक्तिनिपातेन अधःशक्तेर्निकुञ्चनात् ।

मध्यशक्तिप्रबोधेन जायते परमं सुखं

जायते परमं सुखम् । इति ॥ २१ ॥

Edit Permalink Bookmark

इति योगराजोपनिषत् समाप्ता

Edit Permalink Bookmark