श्रीमीनाक्षीमणिमालाष्टकम्

Click Settings to choose another script or language.

मधुरापुरनायिके नमस्ते मधुरालापशुकाभिरामहस्ते ।

मलयध्वजपाण्ड्यराजकन्ये मयि मीनाक्षि कृपां निधेहि धन्ये ॥ १ ॥

कचनिर्जितकालमेघकान्ते कमलासेवितपादपङ्कजान्ते ।

मधुरापुरवल्लभेष्टकान्ते मयि मीनाक्षि कृपां निवेहि दान्ते ॥ २ ॥

कुचयुग्मविभिन्नचक्रवाके कृपया पालितसर्वजीवलोके ।

मलयध्वजसन्ततेः पताके मयि मीनाक्षि कृपां निवेहि पाके ॥ ३ ॥

तपनीयसरोजिनीतटस्थे तुहिनप्रायमहीधरोदरस्थे ।

मदनारिपरिग्रहे कृतार्थे मयि मीनाक्षि कृपां निवेहि सार्थे ॥ ४ ॥

मधुवैरिविरिञ्चिमुख्यसेव्ये मनसा भावितचन्द्रमौलिसव्ये ।

मनसापनिहीतयज्ञहव्ये मयि मीनाक्षि कृपां निवेहि भव्ये ॥ ५ ॥

कलकीरकलोक्तिनाददक्षे कलितानेकजगन्निवासकुक्षे ।

मदनाशुगहल्लकान्तपाणे मयि मीनाक्षि कृपां निधेहि शोणे ॥ ६ ॥

विधिवाहनचैत्रकेलियाने विमतामोटनपूजितापदाने ।

मधुरेक्षणभावपूतमीने मयि मीनाक्षि कृपां निधेहि दीने ॥ ७ ॥

जगदम्ब कदम्बमूलवासे मधुरामोदमुखेन्दुमन्दहासे ।

मदमन्दिरचारुदृग्विलासे मयि मीनाक्षि कृपां निधेहि दासे ॥ ८ ॥

पठतामनिशं प्रभातकाले मणिमालाष्टकमष्टभूतिदायि ।

घटिकाशतचातुरी समिन्धे करुणापूर्णकटाक्षसन्निवेशात् ॥ ९ ॥

॥ इति श्रीमीनाक्षीमणिमालाष्टकं सम्पूर्णम् ॥

Title	श्रीमीनाक्षीमणिमालाष्टकम्
Author	Unknown
Project	Stotrarnava
Date	2026-04-08
Availability	Distributed by Ambuda under a Creative Commons CC0 1.0 Universal Licence (public domain)

Editor
Publisher	Government Oriental Manuscripts Library
Location	Madras
Year	1961

About this text